Эш үз урынында, ә ял итү... Дөрес, тырышып эшлибез, вакытында күңелле ял да итәбез без. Менә инде өченче ел рәттән  Казан шәһәренә, җәйге экскурсиягә юл алдык. Арабызда Олы Шыңар авыл җирлеге, мәдәният йорты, мәктәп, медицина  хезмәткәрләре дә бар иде. Баруыбызның максаты – теплоход белән Идел буйлап сәяхәт итү. Әле теплоход кузгалырга хәйран гына вакыт бар иде, шуңа күрә без “Туган авылым” күңел ачу үзәгенә юл алдык. Күпләребезнең монда булганы, авыл йортлары, күренешләре белән эшләнгән ял итү урынының шундый матур, чиста булганын күз алдына китергәне дә булмаган. Чыннан да, сихерләндек без бу матурлык белән!..

   Ә Иделдә алган хис-кичерешләрне әйтеп, язып бетерерлек кенә түгел. Җәйге җылы, рәхәт көн... Бөтен тирә-якны яңгыратып татарча бию көе яңгырый... Ә татар моңы берәүне дә битараф калдырмады. Теплоходтагы кешеләр генә түгел, хәтта причалда торганнары да көйгә кушылып бии башладылар. Теплоход кузгалып китте... Теплоходта концерт башланды. Җырчыларыбыз Резедә Төхвәтуллина һәм Эльвира Разали үзләренең матур җырлары белән безне биеттеләр, күңелебезне ачтылар. Аннан бер утрауга туктап су коендык, истәлеккә фотога төштек. Кирегә кайту юлы да шулай ук күңелле булды.Бии-бии хәлдән тайдык, аяксыз кала яздык. Әмма күңелләр шат, йөзлзрдә елмаю калды.